Friday, July 3, 2015



                                                     ஹெல்மெட்காரி:

     ஜூலை 1 முதல் தலைக்கவசம் கட்டாயமாக அணிய வேண்டும் என்று உயர்நீதிமன்றம் உத்தரவிட்டதில் இருந்து, எந்த தொலைக்காட்சி எடுத்தாலும் விவாத நிகழ்ச்சியில் 4 பேர் சேர்ந்து கொண்டு, என்னவோ தலைக்கவசத்தை அவர்கள்தான் கண்டு பிடித்ததைப்போல் பேசிக் கொண்டு இருந்தார்கள். தலைக்கவசம் அணிந்தால் எல்லா நோயும் தீர்ந்துவிடும் என்று கூறாததுதான் மிச்சம்.

                        



ரயில் நிலைய பார்க்கிங்கில் வண்டியை விடும் பொழுது நான் எப்பொழுதும் தலைக்கவசம் எடுத்து செல்வது இல்லை. வண்டி காணாமல் போனாலே, கண்டு கொள்ளாத அவர்களிடம் தலைக்கவசம் காணாமல் போய்விட்டது என்று கூறினால், சாருக்கு ஒரு வடை பார்சல் என்று கூறிவிட்டு சென்று விடுவார்கள். அதனால் நான் ரயில் நிலையம் செல்லும்போது எப்பொழுதும் தலைக்கவசம் அணிவது இல்லை. 

ஜூன் 27 அன்று வேளச்சேரி ரயில் நிலையம் சென்றுவிட்டு தலைக்கவசம் அணியாமல் வீட்டிற்க்கு வந்து கொண்டு இருந்தேன். அப்பொழுது ஒரு போக்குவரத்து போலீசார் என்னை தடுத்து நிறுத்தி தலைக்கவசம் எங்கே? என்று கேட்டார். நான் ஜூலை 1-இல் இருந்து தானே கட்டாயம் அணிய வேண்டும் என்று கேட்டேன். 1988-இல் இருந்தே சட்டம் இருப்பதாகவும், ஜூலை 1-இல் இருந்து தலைக்கவசம் இல்லையென்றால் ஆவணங்கள் பறிமுதல் செய்யப்படும் என்று கூறினார். 

அடப்பாவிங்களா! 1988-இல் இருந்து அமலில் இருக்கும் ஒரு சட்டத்தை ஒழுங்காக பின்பற்ற வேண்டும் என்று அரசிற்கு கண்டனம் தெரிவிக்காமல், பொதுமக்களின் ஆவணம் பிடிங்கப்படும் என்பது எந்த விதத்தில் நியாயம் என்று நினைத்துக் கொண்டேன். வர வர நீதிமன்றங்களும், தீர்ப்புகளும் பல விசித்திரங்களையும், ஆச்சிரியங்களையும் கொண்டவைகளாக இருக்கின்றன.
சார்! இனிமே கண்டிப்பா போட்டுட்டு வரேன் சார்! என்று கேட்டுப் பார்த்தேன். படிச்ச நீங்களே போடலனா? எப்படி சார் என்று கேட்டார். எதை வைத்து நான் படித்தவன் என்று முடிவு செய்தார் என்று தெரியவில்லை. வழக்கமாக எல்லா போலீசாரும் முடிக்கும் வசனத்தில் முடித்தார். இங்க பைன் கட்டுறிங்களா? இல்லை கோர்ட்ல போய் கட்டுறிங்களா? என்றார். நான் இங்கயே கட்டுகிறேன் என்று நூறு ருபாய் அழுதுவிட்டு வந்தேன்.

வடிவேலு படத்தில் வருவது போல போலீஸ் பயிற்சியில் லஞ்சம் வாங்க பயிற்சி கொடுப்பார்களோ? என்ற சந்தேகம் வந்தது. ஏனென்றால் ஒரு முறை நாங்கள் குறும்பட ஷூட்டிங்கில் ஈடுப்பட்டு இருந்தபோது அங்கு வந்த போலீசார், இங்கு கேமரா வைத்து படம் எடுக்கக்கூடாது என்று கூறினார்கள். இந்த ஏரியாவில் மத்திய அரசு அலுவலகம் இருப்பதால், இங்கு எடுக்கப்படும் புகைப்படும் ஐ.எஸ்.ஐ.எஸ். தீவரவாதிகளிடம் பகிரும் அபாயம் இருப்பதாக கூறினார்கள். எவ்வளவு சார் வேண்டும் என்று கேட்டேன். 500 ருபாய் கொடுங்க! ஒரு 2 மணி மேரம் எடுத்துட்டு போங்க என்றார்கள். ஒரு 500 ரூபாய்க்காக ஐ.எஸ்.ஐ.எஸ். தீவிரவாதி வரைக்கும் சென்று வந்த அந்த போலீசாரை பார்க்கும்போது கண்டிப்பாக இதற்கு பயிற்சி இருக்கும் என்று தான் எண்ணத் தோன்றுகிறது.

சரி விஷயத்திற்கு வருவோம். ஜூலை 1 வந்தது. பின்னாடி அமர்ந்து செல்பவரும் கட்டாயம் தலைக்கவசம் அணிய வேண்டும் என்று கூறி இருந்ததால் என் மனைவிக்கும் ஒன்று வாங்கினேன்.அன்று காலை WHATSAPP – இல் வந்த மெசேஜ் ஒன்று என்னை சிந்திக்க வைத்தது. ஆவணங்கள் பறிமுதல் செய்வதற்கு பதில் 1000 ருபாய் அபாரதம் வாங்கி, அதற்கு ஒரு தலைக்கவசம் கொடுத்து அனுப்பலாம். இப்படி செய்தால், ஒரு வருடத்தில் அனைவரும் தலைக்கவசம் அணிவார்கள் என்று கூறப்பட்டு இருந்தது. நீதியரசர்களை விட சிறப்பாக யோசிக்கும் பலபேர் இந்தியாவில் இருப்பதை நினைத்து பெருமிதப்பட்டேன்.

என் மனைவியும் நானும் தலைக்கவசத்துடன் பைக்கில் வெளியில் சென்றோம். என் மனைவி எவ்வளவோ பிடிவாதம் பிடித்தாள். பைக் ஒட்டி செல்லும் பெண்ணே, தமிழ்நாட்டுல தலைக்கவசம் போட மாட்டாங்க. நீங்க என்ன போட சொல்றிங்களே? என்று கேட்டாள். அவள் கேட்ட கேள்வி நியாயம்தான். க்ளோவ்ஸ், துப்பட்டா எல்லாம் போட்டு உடலில் தூசு படாமல் வண்டி ஓட்டும் பல பெண்கள் தலைக்கவசம் மட்டும் அணிவது இல்லை. இருந்தாலும் இந்தியாவை நான்தான் காப்பாத்தனும் என்று நினைத்து என் மனைவியைத் தலைக்கவசம் வற்புறித்தி அணிய சொன்னேன்.

ரோட்டில் பைக்கில் செல்லும்போது, எல்லாரும் என்னை பார்க்குறாங்க! என்றாள். சென்னையில் ஆயாவக் கூட பார்ப்பாங்க. அந்த அளவுக்கு காஞ்சி போய் இருக்காங்க என்றேன்.  ஒரு மாதிரி பார்க்குறாங்க! என்றாள். அவள் சொன்னது உண்மைதான். அவள் ஏதோ ஒரே பெரிய குற்றத்தை செய்து விட்டது போல பல பேருடைய பார்வை இருந்தது.

சிக்னலில் வண்டியை நிறுத்தினேன். என் பக்கத்தில் தலைக்கவசம் இல்லாமல் பைக்கில் வந்த ஒருவர், என்னை பார்த்து உங்கள மாதிரி ஆளுங்கனால தான் இந்தியா கெட்டு போகுது என்று கூறி விட்டு, சிக்னலில் நிக்காமல் ஒரு சந்துக்குள் பூந்து விட்டார். என் மனைவி சிரித்தாள். சென்னையில் இரண்டு நாள் வண்டி ஓட்டினாலே, எந்த இடத்தில் போக்குவரத்து போலீசார் நிற்பார்கள் என்பது நன்றாக தெரியும். மெட்ரோ ரயில் மேம்பாலத்தின் நிழலிலும், மேம்பால நிழலிலும் தான் பெரும்பாலும் நிற்பார்கள். அதனால் வெயில் அடிக்கும் நிழல் இல்லாத சாலைகளில் சென்றால், பெரும்பாலும் போலீசார் பிடிக்க மாட்டார்கள். 

வீட்டிற்க்கு வந்தேன். வெளியில் வழக்கமாக பூ விற்று கொண்டு இருக்கும் ஒரு அம்மா, என் மனைவியிடம், கொண்டைகாரம்மா இப்போதான் உங்கள தேடிட்டு வந்துட்டு போனாங்க! என்று கூறினாள்.

என் மனைவி என்னிடம், ஏங்க! அந்த பூக்காரம்மா, எப்போ பார்த்தாலும் கொண்டை வைக்குறதுனால பக்கத்து வீட்டு அம்மாவை, கொண்டைகாரம்மானு சொல்றாங்க! நானும் உங்க கூட ஹெல்மெட் போட்டுட்டு வந்தா ஹெல்மெட்காரின்னு சொன்னாலும் சொல்லுவாங்க என்றாள்.

எனக்கும் அந்த விபரீதம் புரிந்தது. இனிமேல் நீ தலைக்கவசம் அணிய வேண்டாம் என்று கூறினேன். ஊரே அவுத்து போட்டுட்டு ஓடும்போது, நாம மட்டும் ஏன் கோட்டு போட்டுட்டு ஓடனும்? முதல்ல பைக் ஓட்டுறவன் எல்லாம் தலைக்கவசம் போடட்டடும். அதுக்கப்பறமா பின்னாடி உட்காருபவன் போடறத பத்தி யோசிக்கலாம்.

Tuesday, May 26, 2015

சங்கி மங்கி - நகைச்சுவை குறும்படம்

BAD BOYZ குழுமத்தின் பத்தாவது குறும்பட படைப்பு. இந்த நகைச்சுவை குறும்படத்தினை பார்த்து உங்களது மேலான கருத்துகளைக் கூறுமாறு கேட்டுக்கொள்கிறேன்.





இப்படிக்கு,

அ.அருள்செல்வன்.

Monday, May 18, 2015

புறம்போக்கு – திரை விமர்சனம்


முதல் பாதியில் இருக்கும் படத்துக்கு ஒட்டாத சில காட்சிகளையும், பாடல்களையும் தூக்கி இருந்தால் கண்டிப்பாக இந்த படத்தை தமிழில் ஒரு “SHASHANK REDEMPTION” என்று கூறலாம்.


                                               


சிறையில் தூக்கு தண்டனை கைதியாக இருக்கும் ஆர்யாவை மீட்க, அவரது இயக்கத்தினரும், தூக்கு போடும் தொழிலாளியான விஜய் சேதுபதியும் சேர்ந்து திட்டம் தீட்டுகிறார்கள். அதை சிறையதிகாரியான ஷ்யாம் முறியடித்தாரா? என்பது தான் படத்தின் மையக் கரு.

ஆர்யா பார்ப்பதற்கு கம்யூனிஸ்ட் தலைவர் மாதிரி தோன்றினாலும், அவருடைய குரல் அவருக்கு ஒத்துழைக்கவில்லை. அவர் படத்தில் பேசும் பல இடதுசாரி வசனங்கள் ஒப்புவிப்பதை போன்று உள்ளது. இருந்தாலும் அவரது உடல் மொழி அருமை. தன்னுடைய சாக்லேட் பாய் இமேஜில் இருந்து அவர் வெளி வர நினைத்து, கடைசியாக நடித்த மீகாமன் மற்றும் இந்த படத்தில் கதைத்தேர்வு மிக கச்சிதம்.

இயல்பான நடிப்பு, இயல்பான வசன உச்சரிப்பு – இது தானே விஜய் சேதுபதி? நாளைய தமிழ் சினிமாவின் நம்பிக்கை நட்சத்திரமாக மிளிர்கிறார். படத்தின் இரண்டாம் பாதியில் இவரது நடிப்பு, கல் நெஞ்சையும் கரைய வைக்கும். உங்களை ஏற்றிவிட ஒரு மீடியாவும் இல்லையே? என்ற கவலை வேண்டாம். இதே மாதிரி சிறந்த கதை மற்று சிறந்த நடிப்பை வெளிபடுத்துங்கள். மக்களே! உங்களுக்கு மகுடம் சூட்டுவார்கள்.

ஷ்யாம் – தன்னுடைய முழு உழைப்பையும் கொடுத்து ஆறு மெழுகுவர்த்திகள் என்று ஒரு படத்தில் நடித்தார். ஆனால் அவரது நடிப்பை அங்கீகரிக்க யாரும் தயாராகயில்லை. விருதுகள் கொடுப்பவர்கள் வெறும் பிரம்மாண்டத்தையும், லாபத்தையும் மட்டுமே நோக்கினர். இந்த படத்தில் சிறையதிகாரியாக மிகவும் கட்சிதமாக நடித்து இருக்கிறார். நிச்சியமாக மக்கள் மனதில் உங்களுக்கு விருது உண்டு ஷ்யாம். முயற்சிகள் மற்றும் வெற்றிகள் தொடர வாழ்த்துகள்.

கார்த்திகாவின் கதாப்பாத்திரம் மிகவும் செயற்கையாக உள்ளது. நிஜத்திற்கு மிக அருகில் நடக்கும் இது போன்ற திரைக்கதைக்கு இந்த கதாப்பாத்திரம் தேவை தானா? படத்திற்கு மிக அழகாக ஒளிப்பதிவு செய்து இருக்கிறார் ஏகாம்பரம். குறிப்பாக சிறைக் காட்சிகள் உலகத்தரம்.

படத்திற்கு பின்னணி இசை ஸ்ரீகாந்த் தேவா. இவர் தன்னோட சொந்த பின்னணி இசையைதான் படத்திற்கு வழங்கினார் என்றால் தேவாவே வந்து அடிப்பார். அப்பட்டமான உறுவல், mission impossible போன்ற படங்களில் இருந்து.
இந்த மாதிரி திரைப்படங்களை உலக அளவில் எடுத்து செல்ல இசை மிகவும் முக்கியம். இந்த படத்திற்கு மட்டும் இசைஞானி இசை அமைத்து இருந்தால் இந்த படத்தின் தரம் இன்னும் ஒரு ஐம்பது சதவீதம் உயர்ந்து இருக்கும்.

இறுதியாக படத்தை இயக்கி தயாரித்து இருப்பவர் ஜனநாதன். முதல் பாதியில் திரைக்கதையில் தேவை இல்லாமல் பாலைவனம் மற்றும் பனி பிரதேசங்களை காட்டியதைத் தவிர்த்து இருக்கலாம். ஆனால் பிற்பாதியில் திரையரங்கையே தனது கட்டுக்குள் கொண்டு வருகிறார். ஒருவன் தூக்கில் தொங்குவது எவ்வளவு கடினமான செயல் என்பதை அனைவர் மனதிலும் பசுமரத்தாணிபோல் பதிய வைத்துள்ளார். ஏழு தமிழர் விடுதலையை எதிர்நோக்கி உள்ள அல்லது எதிர்க்கின்ற அனைவரும் பார்க்க வேண்டிய படம்.

Tuesday, May 5, 2015

உத்தம வில்லன் உருவான கதை – ஒரு கற்பனை



உத்தம வில்லன் படத்தை கமல் எப்படி உருவாக்கி இருப்பார் என்று ஒரு கற்பனை. இது யார் மனதையும் புண்படுத்துவதற்காக எழுதப்பட்டது அல்ல. அனைவரையும் சிரிக்க வைக்க முயற்சி செய்வதற்காக மட்டுமே எழுதப்பட்டது.


                  



கமலஹாசன், வெளிநாட்டுக்காரர் ஒருவர் கேரளாவில் தெய்யம் திருவிழாவில் எடுத்த புகைப்படத்தை எடுத்து பார்த்துக் கொண்டு இருக்கிறார். அப்பொழுது அங்கே ரமேஷ் அரவிந்த் வருகிறார்.

ரமேஷ் அரவிந்த்: என்ன கமல்ஜி என்ன பண்றிங்க?

கமல்: எவ்வளவோ புத்தகங்கள், இந்திய வரலாறு படித்த எனக்கு இந்த மாதிரி ஒரு ஆட்டம் இருப்பது தெரியாமல் போனது விந்தையாக இருக்கிறது. இது நான் போடாத வேஷமாக இருக்கிறது. இதை உடனே விஸ்வரூபம் 2 படத்தில் பயன் படுத்த வேண்டும்.

ரமேஷ் அரவிந்த்: விஸ்வரூபம் 2 மொத்தமா வேற கதை ஆச்சே! அதுல எப்படி இந்த ஆட்டத்தை சேர்ப்பிங்க?

கமல்: ஏன்? விஸ்வரூபம் 1-ல கதக் ஆடல. அதை தமிழன் வாய பொளந்து பார்க்கல. அதுக்கும் படத்துக்கும் எதனா சம்பந்தம் இருக்கா? என் படத்துல கதை இருக்கோ இல்லையோ! வேஷம் கண்டிப்பா இருக்கணும்.

ரமேஷ்: அது சரி! விஸ்வரூபம் 2 படத்தை உண்மையிலே எடுத்துட்டு இருக்கீங்களா?

கமல்: (கோபமாக) என்னையா பேசுற? அந்த படத்த ஹாலிவூட்ல கூட வராத லேட்டஸ்ட் டெக்னாலஜி வெச்சு எடுக்க போறேன். அதுக்கு 200 கோடி செலவு ஆகும். அதுக்காக தான் வெயிட் பண்றேன். இதுவும் மருதநாயகம் மாதிரி ஒரு உலக படமா கண்டிப்பா வரும்.

ரமேஷ்: (மனதிற்குள், மருதநாயகம் மாதிரியா?) சரி ஜி! அது வரைக்கும் இந்த கெட் அப் யாரும் போட மாட்டங்கன்னு என்ன நிச்சயம்? ஒரு காலத்துல நீங்க மட்டும் தான் கெட் அப் மாத்துனிங்க! இப்போ பவர் ஸ்டார்ல இருந்து எல்லாரும் கெட் அப் மாத்துறாங்களே?

கமல்: அதுவும் சரி தான்! ஜட்டி மாத்துற மாதிரி அவன் அவன் கெட் அப் மாத்துறான். உடனடியா இந்த கெட் அப் போடணும்னா ஒரு புது படம் எடுத்து ஆகனும்.

ரமேஷ்: கெட் அப்க்கு ஒரு படமா?

கமல்: ஆமாம். இந்த கெட் அப்-யே படத்தோட first look-ஆ போடலாம்.

ரமேஷ்: அப்படி போட்டா copy அடிச்சுட்டோம்னு சொல்லுவாங்க ஜி

கமல்: சொல்லட்டும்! நம்ம எது பண்ணாலும் உலகதரம்னு நினைக்க ஒரு கூட்டம் இருக்கு. அவங்க பார்த்துப்பாங்க! அப்படி இல்லனா இந்திய வரலாறு தெரியாத முண்டங்கள்னு நானே ஒரு பேட்டி கொடுத்து ஆப் பண்ணிடுறேன்.

ரமேஷ்: இந்த படத்துல Heroine யார போடலாம்னு இருக்கீங்க?

கமல்: பூஜா குமார், ஆண்ட்ரியா தான். போன படத்துலையே அவங்கள நான் சரியா use பண்ணல!

ரமேஷ்: சார்!

கமல்: யோவ்! சரியான ரோல் கொடுக்கலன்னு சொன்னேன்யா! அதே மாதிரி இந்த படத்துல பாலச்சந்தர் சாருக்கு ஒரு ரோல் கொடுக்கலாம்னு இருக்கேன்! அவருக்கு குரு மரியாதை செய்யனும்.

ரமேஷ்: அதுக்கு இந்த படத்த அவரையே டைரக்ட் பண்ண வைக்கலாமேஜி

கமல்: இல்லை! ஒரு வேலை படம் நல்லா வந்துச்சுனா, பேரு எல்லாம் அவருக்கு போய்டும்.

ரமேஷ்: அப்போ! நீங்களே டைரக்ட் பண்ண போறிங்களா?

கமல்: சுயநலவாதி என்று ஊர் பேசும்.

ரமேஷ்: அப்போ! யார்தான் டைரக்ட் பண்ண போறா?

கமல்: டைரக்ட் பண்றவன் பேர பார்த்ததும், இவன் ஒரு வெத்து வேட்டு, இவன் கண்டிப்பா டைரக்ட் பண்ணி இருக்க மாட்டான். கமல் தான் பண்ணி இருப்பார்னு மக்கள் பேசணும்.அப்படி ஒரு ஆள்.

ரமேஷ்: அப்படி ஒரு கூமுட்டை இருக்கனா? யாருஜி அது.
கமல்: வேற யாரு நீதான்

ரமேஷ்: அதிர்ச்சி அடைகிறார் (மனதிற்குள், என்ன பலிகடா ஆக்க பார்க்குறியா? இந்த குப்ப படத்தை எவன் தயாரிக்கிரானு பார்க்கலாம்).
கமல்: என்ன மனசுக்குள்ள நினைக்குற? இந்த உலகத் திரைப்படத்தை தயாரிக்குற பாக்கியம் யாருக்கு இருக்குனுதான?

ரமேஷ்: ஆமாம்ஜி!

கமல்: போன வருஷத்துல மிக பெரிய உலகத் திரைப்படத்த கொடுத்தவர். தான் கத்துகிட்ட மொத்த வித்தையையும் ஒரே படத்துல இறக்கினவர். நம்ம tuning லிங்குசாமி தான்.

ரமேஷ்: (அதிர்ச்சியாகி) சார் அவரா? அஞ்சான் படத்தையா உலகப்படம்னு சொல்றிங்க.

கமல்: ஆமாம்யா! எவன் பொண்டாட்டி பத்தினியோ அவனுக்கு எல்லாம் அது உலகப்படம் தான். அந்த படம் இப்போ புரியாது! 10 – 15 வருஷம்கழிச்சுதான் புரியும்.

ரமேஷ்: (மனதிற்குள் – இப்படியே எத்தனை படத்துக்கு சொல்றது) சரி சார்! மியூசிக் ஏ.ஆர்.ரகுமான் இல்லை இளையராஜாவா போடலாமா?

கமல்: யோவ்! அவங்க எல்லாம் படத்துல நான் பாடுறதுக்கு ஒரு பாட்டுக்கு மேல தர மாட்டாங்கயா!

ரமேஷ்: சங்கர் மகாதேவனும் போன படத்துல பாதியிலே போய்ட்டார். அப்போ வழக்கம் போல தேவிஸ்ரீபிராசாத் போட்டுடலாமா?

கமல்: (பதற்றமாகி) அவர் மட்டும் வேணாம்பா! போன படத்துலையே காத செவிடாக்கிட்டான். வாயா வெச்சு இருக்கான். காட்டு கத்து கத்துரான்யா! சங்கீதமும் தெரிஞ்சவனா இருக்கணும். அதே நேரத்துல நம்ம சொல்றத செய்றவனாவும் இருக்குனும். வேணும்னா வைரமுத்துவவிட்டு ஜிப்ரான கேட்க சொல்லலாம்.

ரமேஷ்: சார் நீங்க ஒரு உத்தமன் பிளஸ் வில்லன் சார்.

கமல்: சூப்பர். அதுதான் படத்தோட பேர். உத்தம வில்லன்.

Related posts

Related Posts Plugin for WordPress, Blogger...