Tuesday, December 30, 2014

சென்னையில் ஒரு மழை நாள்:

சென்னையில் நேற்று பெய்த மழையும், நிலவிய ரம்மியமான வானிலையும் எப்பொழுது அலுவலகத்தில் இருந்து வீட்டிற்க்கு செல்வோம் என்று எண்ணத் தோன்றியது.அதனால் விரைவாக வீடு செல்ல எண்ணி தரமணி தொடர்வண்டி நிலையத்திற்கு விரைந்தேன்.செல்லும் சாலை எங்கும் வழக்கம் போல் ஏதோ ஒரு அரசுத்துறை மரணக்குழிகளை தோண்டி வைத்து இருந்தனர்.
சாலை எங்கும் ஆறாக ஓடியது.சென்னையில் எப்பொழுது மழை பெய்தாலும் ஆறாக ஓடும் நீரைப்பார்க்கும் போது தஞ்சையை விட சென்னையில் விவசாயம் செய்தால் முப்போகம் விளையுமோ? என்ற எண்ணம் தோன்றியது, இந்த சாலையில் நடக்க கண்டிப்பாக நீளம் தாண்டுதல் பயிற்சியும், உயரம் தாண்டுதல் பயிற்சியும் வேண்டும்.

                                           


பைக்கில் சென்றவர்கள், காரில் சென்றவர்கள் அனைவரும் சாலையின் ஓரத்தில் நாய்கள் நடந்து செல்வதாக எண்ணி சேற்றை வாரி இறைத்து விரைவாக சென்றனர்.எல்லா மக்களுக்கும் அவசர வேலை உள்ள நாடு எப்படி வல்லரசாக மாறாமல் போனது என்று எண்ணினேன்.ஒரு வழியாக தொடர்வண்டி நிலையம் வந்து வரிசையில் நின்று டிக்கெட் எடுக்க ஆரம்பித்தேன். வழக்கம்போல் விஐபி கலாச்சாரத்தைமட்டும் எதிர்க்கும் பல மக்கள் வரிசையில் நிற்பதை தவிர்த்து நடுவில் புகுந்தும், பெண்களில் பலர் புதுமை பெண்கள்போல் காட்சி அளித்தாலும், தான் பெண் என்பதை காரணம் காட்டி சில ஆண்களிடம் பணத்தைக் கொடுத்து டிக்கெட்டை பெற முயற்சித்தனர். பெண்களுக்கு சேவை செய்வதையே தங்கள் குறிக்கோளாக கொண்ட பல ஆண்கள் பின்னால் நிற்பவர்களைப் பற்றி கவலைப்படாமல் அவர்களுக்காக டிக்கெட் எடுத்தனர்.

ரயிலுக்காக 30 நிமிடங்கள் காத்து இருந்தேன். பக்கத்தில் இருக்கும் ஒருவர் தன நண்பரிடம் தொலை பேசியில் பேசியதை வைத்து கோட்டுர்புரம் அருகே மின் கம்பி அறுந்து விழுந்து இருக்கிறது என்று அறிந்து கொண்டேன். வெயில் காலத்திலே இந்த மாதிரி பிரச்சனையை விரைந்து வந்து செயல்பட்டு இரண்டு நாட்களில் சரி செய்யும் நம் ரயில்வே ஊழியர்கள் எப்படியும் இதனை மூன்று நாட்களில் சரி செய்து விடுவார்கள் என்று எண்ணி அங்கு இருந்து நடையைக் கட்டினேன்.

எனக்கு மிகவும் வேதனை அளித்த செய்தி என்னவென்றால், பேருந்து வேலை நிறுத்தத்தின் காரணமாக பலர் ரயில்களில் செல்வதற்காக காத்து இருந்தனர். அவர்களை சக மனிதர்களாக மதித்து ஒலி பெருக்கியில் செய்தி சொல்ல கூட ரயில்வை நிர்வாகம் தயாராக இல்லை. டிக்கெட் வாங்கும் இடத்திலும் ரயில்கள் வருவது சந்தேகம் என்ற தகவல் தெரிவிக்கப்படவில்லை. என்னால் முடிந்த அளவு பலருக்கு தகவல் கொடுத்து, டிக்கெட் வாங்குபவர்களையும் தடுத்தேன்.

வெளியில் வந்து பேருந்து நிலையத்தில் நின்றால், எழுபத சதவீத பேருந்துகள் ஓடுவதாக செய்திகளில் தெரிவிக்கப்பட, ஒரு பேருந்து கூட சாலைகளில் இல்லை. யார் வந்து பேருந்துகளை கணக்கு எடுக்கப் போகிறார்கள் என்கின்ற நினைப்பில் போக்குவரத்துத்துறை அந்த செய்தியை வெளியிட்டு இருக்கலாம். இந்த கரடு, முரடான சாலையிலும்,இரும்பு கடைக்கு போட தயாராக இருக்கும் வண்டியையும் ஓட்டும் போக்குவரத்து தொழிலாளர்களுக்கு சம்பள உயர்வு தரலாம் என்றாலும், அவர்கள் பணியில் காட்டும் அலட்சியமும், பயணிகளை நடத்தும் விதமும் மக்களிடையே மிகுந்த அவப்பெயரை அவர்களுக்கு ஏற்படுத்தி இருக்கிறது. ஆதலால் இந்த பிரச்னையில் யார் அடித்துக்கொண்டு செத்தாலும் மக்களுக்கு கவலையில்லை, அவர்களுக்குத் தேவை பேருந்து ஓட வேண்டும் அவ்வளவுதான்.

அப்பொழுது ஒரு நடுத்தர இளைஞன் என்னிடம் வந்தான். ப்ரோ, இருந்த காசுல ட்ரைன் டிக்கெட் எடுத்துட்டேன், பஸ்சும் வரல, ஷேர் ஆட்டோல போகணும், ஒரு ஐம்பது ருபாய் இருக்குமா? என்று கேட்டார்.நான் இல்லை என்றேன். அப்பொழுது என்னிடம் இருந்ததும் ஐம்பது ரூபாய்தான். அவர் ஒரு சிரிப்பு சிரித்து விட்டு நடையை கட்டினார். நானும் ஒரு சராசரி இந்தியன் என்று அவர் நினைத்து இருக்கலாம். அவரை மாதிரி பலர் கொட்டும் மழையில் நடந்து செல்வதை கண்டேன். அவர்கள் வீடு எங்கே இருக்கிறது என்று தெரியவில்லை.

மழை என்பது வரமாக அமைய வேண்டிய நம் நாட்டில் அது ஒரு சாபமாக அமைந்து இருக்கிறது.

இப்படிக்கு,
அ.அருள்செல்வன்.

Sunday, December 14, 2014

லிங்கா ஒரு ரசிகனின் குமுறல்




 

லிங்கா படம் நன்றாக இல்லை என்று பதிவிட்டது தான் தாமதம், நான் ரசிகன் என்னும் போர்வையில் வாழும் துரோகி என்று என்னை வசைப்பாடியவர்கள் மிக அதிகம். நான் ரஜினியின் எவ்வளவு பெரிய ரசிகன் என்பது, எனது வலைப்பூவை(www.arulselvan.com) பின்தொடருபவர்களுக்கு நன்றாகவே தெரிந்து இருக்கும். ஒரு படத்தைப் பற்றி குறை கூறுவதால், அவர்கள் ரஜினியைப் பற்றி குறை கூறுவதாக யாரும் எடுத்துக்கொள்ளக் கூடாது. இப்படிதான் பல ரசிகர்கள் தற்பொழுது செய்து கொண்டு இருக்கிறார்கள். படத்தைப் பற்றி குறை கூறியவர்களை வசை பாடும் செயலை ரசிகர்கள் பலர் செய்து வருகின்றனர்.

அது அவர்கள் குற்றம் அல்ல. நாம் வாழும் இந்திய சமூகம் அப்படிப்பட்டது. அரசியல் கட்சி தலைவர்கள் எவ்வளவு குற்றம் புரிந்தாலும் அவர்களுக்கான வாக்கு வங்கி அப்படியே இருப்பது அதனால்தான். தலைவர்கள் எதை செய்தாலும் அதை கண்மூடி தனமாக ஆதரிப்பதும், அவர்கள் செய்யும் தவறுகளை சுட்டிக்காட்டாமல் இருப்பதும்தான் நமது சமூகம் நமக்கு கற்றுக் கொடுத்த பாடம். விஜய், அஜித் போன்றவர்கள் இன்றுவரை ஒரு நல்ல கதையை தேர்வு செய்து நடிக்காமால் இருப்பதற்கும் அதுதான் காரணம். அவர்களை சுற்றி இருப்பவர்கள் எதிர்மறையான விமர்சனங்களை அவர்களை சென்றடையாமல் செய்து விடுகின்றனர். 

ஆனால் ரஜினி அப்படிப்பட்டவர் அல்ல. பாபா,குசேலன் போன்ற திரைப்படங்கள் தோல்வி குறித்து வெளிப்படையாக ஒப்புக்கொண்டவர். ஏன் சமீபத்தில் கோச்சைடையான் தோல்வி குறித்து கூட லிங்கா இசை வெளியீட்டு விழாவில் கூறினார். இன்னும் கொஞ்ச நாளில் அவரே கூட லிங்கா படத்தை நான் செய்து இருக்கக்கூடாது என்று கூறுவார். அப்பொழுது இந்த ரசிகர்கள் என்ன செய்வார்கள் என்று தெரியவில்லை. உங்களை பொறுத்தவரை படம் நன்றாக இருந்தால், விமர்சனம் போடுங்கள். அனால் படம் நன்றாக இல்லை என்று கூறுபவர்களை வசைப்பாடாமல் இருங்கள் அதுபோதும். ஏனென்றால் அனைவருக்கும், அனைத்தும் பிடிக்க வேண்டும் என்ற அவசியம் இல்லை.

சரி லிங்கா படத்திற்கு வருவோம். இது ஒரு ரஜினி படம் என்று ஒத்துக்கொள்ளவே என்னால் முடியவில்லை. ஒரு காட்சி கூட பிடித்த காட்சி என்று சொல்ல முடியாத அளவில் தான் இருக்கிறது படம். எப்பொழுதோ தமிழ் சினிமாவில் செத்துப்போன ஒரு பார்முலாவை வைத்து நம்மை எல்லாம் சங்கடத்தில் ஆழ்த்திவிட்டார் இயக்குனர்.
இந்த படத்தில் ரஜினியை புகழ்ந்து ஒருவர் கவிதை பாடுவதாக ஒரு காட்சி வரும். அந்த காட்சியும், அதற்கு ரஜினி கூறும் பதிலும் ஐந்து நிமிடங்கள் ஓடும். இந்த காட்சி பலமுறை நாம் வடிவேல் மற்றும் செந்தில் நகைச்சுவை காட்சிகளில் பார்த்ததுதான். இந்த ஒரு காட்சி போதும், கதை, திரைக்கதை இந்த படத்தில் எப்படி இருக்கும் என்று கூறுவதற்கு. ஒரு காட்சி கூட புதுமையான காட்சி கிடையாது.
அதேபோல் ரஜினியும், அனுஷ்காவும் சாவி திருடும் ஒரு காட்சி, ஆங்கில படத்தில் இருந்து அப்பட்டமாக காப்பி அடிக்கப்பட்ட காட்சி. இப்படி வசனம், காட்சி என்று எதுவும் மனதில் ஒட்டாத ரஜினி படத்தை இதுவரை நான் பார்த்தது இல்லை.(குசேலன், பாபா உட்பட). அடுத்ததாக பாடல் மற்றும் இசை. பாடல்கள் வந்த புதிதில் நான் பாடல்கள் நன்றாக இல்லை என்று கூறி இருந்தேன். உடனே நான் மேலே கூறியது போல அவரது ரசிகர்கள், ரகுமான் பாடல்கள் கேட்க,கேட்கதான் பிடிக்கும். உனக்கு இசை ரசனை நன்றாக இல்லை என்று என்னை வசைப்பாட ஆரம்பித்துவிட்டார்கள். பாடல்கள் கூட பொருத்து கொள்ளலாம், ஆனால் படத்திற்கு அவர் போட்டிருக்கும் பின்னணி இசை படு மட்டம். 

ஏற்கனெவே ரஜினியை வைத்து காமெடி செய்து வரும் வட இந்தியர்களுக்கு தீனி போடும் விதமாக லிங்கா படத்தின் கிளைமாக்ஸ் காட்சி உள்ளது. இந்த காட்சியை வைத்து எப்படி எல்லாம் கிண்டல் செய்ய போகிறார்களோ என்ற எண்ணம் என் மனதிற்குள் ஓடிக்கொண்டு இருக்கிறது. எப்படி பாண்டியன் படத்தோடு எஸ்.பி.முத்துராமன் படம் எடுப்பதை நிறுத்திக்கொண்டாரோ, அதேப்போல் கே.எஸ்.ரவிகுமாரும் நிறுத்திக்கொள்வது சால சிறந்தது.
ரஜினி கண்டிப்பாக அடுத்து ஒரு சிறந்த படம் கொடுப்பார் என்பதில் சிறிதும் யாரும் சந்தேகம் கொள்ள வேண்டாம். ஏனென்றால் அவர் யானை அல்ல குதிரை. விழந்தவுடன் உடனே எழுவார்.

Saturday, November 22, 2014

ரஜினியைப் பற்றிய அரசியல் விமர்சனங்கள் – ஒரு ரசிகனின் பதில்



                         

 
லிங்கா பட பாடல் வெளியீட்டு விழாவில் அரசியல் குறித்து ரஜினி பேசிய கருத்துகள் குறித்து நண்பர்கள் பலர் என்னிடத்தில் கேட்டனர். கேட்டனர் என்பதை விட கேலி செய்தனர் என்பதே சரியாக இருக்கும். சிறு வயதில் இருந்து ரஜினி ரசிகனாக இருப்பதால் ஏற்படும் கஷ்டங்களை என்னுடைய “ரஜினிசம்” சிறுகதையில் ஏற்கனெவே கூறி இருந்தேன். அதனைப் படிக்காதவர்கள் கீழே உள்ள சுட்டியில் பார்க்கலாம்.


இப்பொழுது நண்பர்கள் கேட்ட கேள்விகள். அதற்கான பதில்களைக் காண்போம்.

கேள்வி 1: ரஜினி லிங்கா படத்தின் விளம்பரத்திற்காக அரசியல் பற்றி பேசினாரா?

பதில்: ரஜினி அரசியலுக்கு வருகிறாரா? இல்லையா? என்பதற்கான பதில் படத்தில் உள்ளது என்று சில பத்திரிக்கைகளால் செய்தி வெளியிடப்பட்டு வெளிவந்த முதல் படம் “வள்ளி”. அந்த படம் அடைந்த இமாலய தோல்வி தமிழ் மக்கள் அறிந்தது தான். 20 வருடங்களுக்கு முன்னாலே அந்த நிலைமை என்றால் இப்பொழுது சொல்லவே வேண்டாம். அதனால் படம் நன்றாக இருந்தால்தான் ஓடும் என்பதை அறியாதவர் அல்ல ரஜினி. அதனால்தான் இந்த வயதிலும் சிவாஜி, எந்திரன் உள்ளிட்ட பல படங்களில் சிரமப்பட்டு நடிக்கிறார். ரஜினி தும்மினாலும் அதனை செய்தியாக்கி விளம்பரம் தேடும் பத்திரிக்கைகள்தான் இன்று அவரை இந்த அளவிற்கு விமர்சிக்கின்றன.

மற்ற நடிகர்கள்போல் படத்திற்கு சாதி பெயர் வைத்தோ! அல்லது பிற மதத்தினரை சங்கடப்படும் விதத்தில் கருத்துக்கள் கூறியோ! விளம்பரம் தேடும் மனிதர் அல்ல ரஜினி. லிங்கா பட விழாவில் சில நடிகர்கள் கூறிய கருத்துகளுக்கு அவர் பதில் கூறினார் அவ்வளவுதான். பட விழாவில் ஏன் அரசியல் குறித்து பேசினார் என்று ரஜினிடம் கேள்வி கேட்பதை விட அமீர், சேரன்,வைரமுத்து ஆகியோரிடம் தான் கேள்வி கேட்க வேண்டும்.
எனவே ரஜினி என்ற பிம்பத்திற்கு தமிழ்நாட்டில் விளம்பரம் தேவை இல்லை என்பது சின்ன குழந்தைக்கும் தெரியும். ஆகவே, இந்த கேள்வி அர்த்தமற்றது.

கேள்வி 2: நதிநீர் இணைப்பிற்காக எப்பொழுது ஒரு கோடி ருபாய் கொடுப்பார்?

ரஜினியின் மீது எவ்வளவு காழ்ப்புணர்வு இருந்தால் இந்த மாதிரியான கேள்விகள் எழும்? நதிநீர் இணைப்புத் திட்டத்தை செயல்படுத்தினால் முதல் ஆளாக நான் ஒரு கோடி ருபாய் தருகிறேன் என்று ரஜினி கூறி இருந்தார். இன்று வரை நதி நீர் இணைப்புத் திட்டத்தை செயல் படுத்தினார்களா? பிறகு எதற்கு அவர் ஒரு கோடி ருபாய் தர வேண்டும்?

நதிநீர் இணைப்பு திட்டத்தை செயல் படுத்தினால் சுகாதார சீர்கேடு ஏற்படும் என்று ராகுல்காந்தி கூறினாரே? அவரை எதிர்த்து யாராவது கேள்வி கேட்டீர்களா? அல்லது நதிநீர் இணைப்பை செயல் படுத்துவோம் என்று ஆட்சிக்கு வந்த அரசியல்வாதிகளைக் கேள்வி கேட்டீர்களா? ரஜினியை மட்டும் கேள்வி கேட்க வரிந்து கட்டிக்கொண்டு நிற்கிறீர்கள்.

கார்கில் நிதிக்கு 10 லட்சம், சுனாமிக்கு 20 லட்சம், இலங்கை தமிழர்களுக்கு 10 லட்சம் என லட்சம், லட்சமாக வழங்கியவர் அவர். அதுமட்டுமல்லாமல் பல கோடி ருபாய் மதிப்புள்ள ராகவேந்திர திருமண மண்டபத்தை தமிழர்கள் பெயரில் படையப்பா வெள்ளிவிழாவின் போதே எழுதி கொடுத்தவர். அதற்கான சுட்டி கீழே.


அதனால் ரஜினிக்கு ஒரு கோடி என்பது ஒரு பொருட்டே கிடையாது. நாளைக்கே நதி நீர் இணைப்பு திட்டம் அறிவித்தால், முதல் ஆளாக ஒரு கோடி ருபாய் தருவது ரஜினியாக தான் இருக்கும் என்பது, அவரைப் பின்பற்றும் அனைவருக்கும் தெரியும். ஆகவே இந்த கேள்வி கேலிக்குரியது.

கடைசி கேள்வி: கடவுள் சொன்னால் நாளைக்கே அரசியலுக்கு வருவேன் என்று கூறுகிறாரே?

கடவுள் மறுப்பு கொள்கை கொண்ட எனக்கு, கடவுள் சொன்னால் நாளைக்கே அரசியலுக்கு வருவேன் என்று ரஜினி சொல்வதில் உடன்பாடு இல்லைதான். அதனால் ரஜினி விழாக்களில் கூறிய ஒரு சிறுகதையில் இருந்தே அதற்கு விளக்கம் தர விழைகிறேன்.

ஒரு ஊரில் வெள்ளம் வந்து அனைத்தையும் அடித்து சென்று விட்டது. சிவ பக்தன் ஒருவன் மட்டும் பனை மரத்தின் மீது ஏறி தப்பித்துக்கொண்டான். அப்பொழுது அந்த வழியாக படகில் வந்த ஒருவன், வா! படகில் வந்து ஏறிக் கொள் என்றான். அதற்கு சிவ பக்தன், இல்லை என்னை கடவுள் வந்து காப்பாற்றுவார்! என்று கூறி பனை மரத்திலே இருந்து விட்டான்.

இப்பொழுது பனை மரத்தின் பாதி அளவிற்கு தண்ணீர் வந்து விட்டது. அப்பொழுது அந்த வழியாக படகில் வந்த இன்னொருவன், வா! படகில் வந்து ஏறிக் கொள் என்றான். மறுபடியும் அந்த சிவ பக்தன், இல்லை என்னை கடவுள் வந்து காப்பாற்றுவார்! என்று கூறி பனை மரத்திலே இருந்து விட்டான்.

தற்பொழுது பனை மரத்தின் கழுத்து அளவிற்கு தண்ணீர் வந்து விட்டது. அப்பொழுதும் அந்த வழியாக படகில் வந்த இன்னொருவன், வா! படகில் வந்து ஏறிக் கொள் என்றான். மீண்டும் அந்த சிவ பக்தன், இல்லை என்னை கடவுள் வந்து காப்பாற்றுவார்! என்று கூறி பனை மரத்திலே இருந்து விட்டான்.அதே நேரத்தில் அந்த பனை மரம் வெள்ளத்தில் அடித்து செல்லப்பட்டு விட்டது.

இறந்த சிவ பக்தன் நேராக கடவுள் இடத்தில் சென்று, உன்னையே நம்பிய என்னை காப்பாற்றாமல் விட்டு விட்டாயே! என்று கேட்டான். அதற்கு கடவுள், அடப்பாவி! மூன்று முறையும் மனிதன் ரூபத்தில் வந்து உன்னை காப்பாற்ற நினைத்தது நான் தான்! அதை புரிந்து கொள்ளாமல் நீ உன் உயிரை விட்டு விட்டாயே! என்று கூறினார்.

அதனால் கடவுள் யாருடைய காதிலும் நேரடியாக வந்து எதையும் சொல்ல மாட்டார். ரஜினிக்கும் மூன்று வாய்ப்புகள் கொடுத்துள்ளார்.

1996 – இல் மூப்பனார் வடிவில் ஒன்று. அன்று மட்டும் ரஜினி முடிவு எடுத்து இருந்தால் இந்நேரம் அவர் முதல் அமைச்சராகி 18 ஆண்டுகள் ஆகி இருக்கும்.

1999 – இல் இயக்குனர் ஷங்கர் வடிவில் ஒன்று. அப்பொழுது முதல்வன் படத்தில் நடித்து இருந்தால், கண்டிப்பாக 2001 இல் ஒரு பெரிய அரசியல் சக்தியாக உருவெடுத்து இருக்கலாம்.

2004 – ராமதாஸ் வடிவில் ஒன்று. அப்பொழுதும் கட்சி ஆரம்பித்து இருந்தால் பெரிய அரசியல் சக்தியாக உருவெடுத்து இருக்கலாம்.

இப்பொழுதும் கூட கடவுள் நீதிபதி மைக்கல் குன்கா அவர்கள் வடிவில் வந்து இருக்கிறார். தற்பொழுதும் நீங்கள் கடவுளின் கட்டளைக்காக காத்து இருக்கிறேன் என்று கூறி, நல்ல தலைவர் இல்லாமல் யாருக்கு 2016 ஆம் ஆண்டு ஓட்டு போட வேண்டும் என்பது தெரியாமல் அல்லல்பட்டுள்ள தமிழக மக்களை மீண்டும் காக்க வைக்காதே!

முடிவெடு தலைவா! இருண்டு கிடக்கும் தமிழகத்தை காப்பாற்ற வா! மக்களுக்கு நல்லது செய்ய முடியுமா? என்று எல்லாம் யோசிக்காதே! தற்போதைய மக்களுக்கு முதல் விருப்பம் தங்களை ஏமாற்றாத தலைவர் தான், இரண்டாவது விருப்பம் மட்டுமே நல்லது செய்யும் தலைவர்கள்.

நீயும் தொண்டனை ஏமாற்றிய தலைவனின் பட்டியலில் சேர்ந்து விடாதே! உன்னுடைய உடல் நிலை ஒத்துழைக்காது என்று நீ நினைத்தால், சகாயம் போன்ற உத்தமர்கள் கட்சி தொடங்கினால், அவர்களுக்கு ஆதரவு கொடு! அதுதான் நீ தமிழ்நாட்டிற்கு செய்ய காத்திருக்கும் மிக பெரிய நன்மை.

இப்படிக்கு,
உன் உண்மை ரசிகன்,
அ.அருள்செல்வன்.



Thursday, October 23, 2014

கத்தி- தமிழன் தலையில சுத்தி


                                                           



வேலாயுதம் படத்திற்கு எனது பக்கத்தில் திரைவிமர்சனம் எழுதி கொலை மிரட்டல் வந்த பிறகு, நீங்க எந்த படத்தை வேணும்னா பார்த்து நாசமா போங்கடா! என்று அதன் பிறகு விஜய் படம் பற்றி ஒன்றும் எழுதுவது கிடையாது. அந்த விமர்சனத்தைப் பார்க்க கீழே உள்ள லிங்கை பார்க்கவும்.

http://www.arulselvan.com/2011/11/velayudham-review.html

தலைவா திரைப்படத்தை பற்றி ஊரே கழுவி ஊற்றிய போது கூட, நான் ஒரு வார்த்தை எழுத வில்லை. ஜில்லா திரைப்படம் ஒரு உலக திரைப்படம் என்று என் நண்பன்(விஜய் ரசிகன்) கூறியபோது கூட, நான் அவன் உலக அறிவைப் பார்த்து வியந்தனே ஒழிய, ஒரு வார்த்தை எதிர்த்து பேசவில்லை. இருந்தாலும் நேற்று கத்தி திரைப்பட அரங்கில் நடைபெற்ற இந்த சம்பவம் இந்த பதிவை மீண்டும் எழுத என்னைத் தூண்டியது.

இலங்கையில் போர் உச்சத்தில் இருக்கும்போதே நாம் ஐ.பி.எல் மேட்ச் பார்த்து நம் தமிழ் உணர்வைக் காட்டியவர்கள். இலங்கை அதிபரின் பினாமி என்று நம்பப்படும் ஒருவர் எடுத்த படத்தை முதல் நாளே பார்கவில்லை என்றால் நான் தமிழனே இல்லை என்று முடிவு செய்து முதல் நாள் முதல் காட்சிக்கு சென்றேன்.

நான் தலை தீபாவளிக்காக என் மனைவியின் ஊரான திருத்திரைபூண்டிற்கு சென்று இருந்தேன். அங்கு இருந்த ஒரு திரையரங்கில் படம் பார்ப்பதற்காக சென்றேன். அங்கு டிக்கெட் முன்பதிவு எல்லாம் கிடையாது. அதனால் டிக்கெட் வாங்க வரிசையில் நின்றேன். செம கூட்டம். வழக்கம் போல் பள்ளி மாணவர்கள், கல்லூரி மாணவர்கள் எல்லாம் குடித்து விட்டு வருங்கால முதல்வர் விஜய் வாழ்க! என்று கோஷம் எழுப்பிக் கொண்டு இருந்தனர். அடுத்த படமும் ஒழுங்காக ரிலீஸ் ஆகாது என்று அவர்கள் போட்ட கோஷத்தில் இருந்தே தெரிந்தது.

விஜய்யின் பானரில் ஏறி பால் ஊற்ற முயன்றான் ஒருவன். அப்பொழுது அந்த 40 அடி பானர் குழுமி இருந்தவர்கள் மீது விழப் பார்த்தது. ஆனால் அதனை 20 இளைஞர்கள் தாங்கிப்பிடித்து கொண்டனர். மற்றொரு பக்கத்தில் டிக்கெட் வாங்க நேர்ந்த தள்ளுமுள்ளில் ஒரு இளைஞன் மயங்கி விழுந்தான். அவனுக்கு வலிப்பு வந்து விட்டது. அவனை யாரும் கண்டு கொண்டதாக தெரியவில்லை. டிக்கெட் வாங்குவதில் குறியாக இருந்தனர்.ஆனால் காலையில் சரக்கு கிடைக்காதலால் குடிக்காத இரண்டு இளைஞர்கள் அவனைத் தூகிக் கொண்டு எங்கோ வெளியில் ஓடினார்கள்.

எனக்கு இதற்கு மேலும் அங்கு இருந்தால் விபரீதம் என்று தோன்றியது. நாளை காலை வரும் செய்தித்தாளில்,

“தலை தீபாவளிக்கு வந்த மாப்பிள்ளை திரையரங்கில் மயங்கி விழுந்தார்”
என்று செய்தி வந்தாலும் வரும் என்று நினைத்தேன்.

அதுகூட பரவாயில்லை. எப்பொழுதும் செய்தியைத் திரித்துக்கூறும் செய்தி தாள்கள், அந்த செய்தியை பின்வருமாறு வெளியிட வாய்ப்பு உள்ளது என்று நினைத்தேன்.

“விஜய் ரசிகர் டிக்கெட் வாங்கும் முயற்சியில் மயங்கி விழுந்தார்.”

அந்த பயங்கர எண்ணம் வந்தவுடன் படம் பார்க்கும் ஆசையைக் கைவிட்டு வீட்டிற்கு சென்று விட்டேன்.

கோக்ககோலா குளிர்பான நிறுவனம், ஒரு கிராமத்தில் உள்ள அனைத்து நிலத்தடி நீரையும் உறிஞ்சி, விவசாயத்திற்கு குடிநீர் இல்லாமல் செய்து விட்டது என்ற போராட்டம் பல காலமாக நடந்து வருகிறது. அந்த நிறுவனத்திற்காக பணத்தைப் பெற்றுக்கொண்டு விளம்பரத்தில் நடிக்கும் ஒரு நடிகன், விவசாய நிலத்தைப் பற்றி கூறும் கருத்தைக் கேட்க பல இளைஞர்கள் இப்படி வரிசையில் நிற்கிறார்கள் என்று நினைக்கும்போது, உங்கள எல்லாம் எத்தனை கவுண்டமணி வந்தாலும் திருத்த முடியாதுடா என்று தோன்றியது.

Related posts

Related Posts Plugin for WordPress, Blogger...